Bismillahir rahman nirahiim.
Alhamdulillahi rabbil ‘alamiin, asholatu wa salammu ‘ala asrafil anbiya’i wal mursalin, sayyidina wa maulana muhammadin wa ‘ala alihi wa shohbihi ajma,in Para pepundhen sepuh, sesepuh saha para pinisepuh kakung miwah putri ingkang dahat kinabekten,
Para kadang sepuh, kadang sabarakan kakung miwah putri ingkang kinurmatan.
Para kadang mudha jalwestri ingkang tansah bekti dhumateng tiyang sepuh lan Illahi.
Para pangarsaning Paguyuban “T rah Irotaruno 2001 “ ingkang tuhu wicaksana lan luhuring budi,
Sanak kadang mitra pitepangan, tangga tepalih panyengkuyung titi laksananing pepanggihan ri puniki ingkang kula hormati.
Langkung rumiyin sumangga kula dherekaken tumungkul sawetawis muhung mahaseng asepi nyebat Asma Dalem Alloh s.w.t. munjuk syukur awit paringipun sih paripirma, nikmat kabagas warasan, kawilujengan, raos ikhlas, teteping iman, sumanggeming wardaya lan sanes- sanesipun, ingkang mangaribawani kempal kula jengandika sami wekdal menika kanthi suka renaning driya. Alhamdulillahi rabbil ‘alamiin.
Salajengipun mugi andadosna uninga bilih wekdal menika kula kadhawuhan ndherekakan titi laksananing Ikrar halal bil halal.
Kanthi menika pinanggihing suba sita lan trap sila ingkang tebih saking paugeraning tata karma, langkung- langkung pangrakiting basa ingkang nalisir saking lampahing parama sastra,kanthi angasih- asih kula nyuwun mugi para lenggah samya hamigarna jaja mbedhah tambaking samodra pangaksama linuberna dhateng kula.
Wondene titi laksananing ikrar jengandika, saksampunipun kula matur. Ikrar sesarengan kapurwakan Basmallah pungkasanipun Amiin yaa rabbal ‘alamiin.
Amrih nggemblenging tekad, antebing niyat, prayogi ikrar katindakaken kanthi jumeneng. Sumangga!
Bismillahirrahmannir rahim/
Langkung rumiyin/ sungkem bekti kula/ mugi katur para pepundhen sepuh/ para sepuh/ para pinisepuh/ saha para kadang sepuh/ kakung miwah putri.
Salam taklim katur dhumateng/ para kadang sabarakan/ kakung saha putri.
Pamecut/ pandudut/ pemut/ donga pamuji/ tumrap para kadang/ mudha kakung lan putri.
Salajengipun/ ngaturaken sugeng riyadi/ sewu kawan atus tigang dasa tiga Hijrah/ dhumateng sagung rawuh/ kakung miwah putri.
Wosing atur kula/ kula nglenggana/ hilaf lepat kula/ lair lan batos/ ingkang kasengaja tuwin mboten/ ujar seklimah lampah setindak/ ingkang nalisir / saking kautamen lan agami/ ingkang tumanduk dhumateng/ para pepundhen sepuh/ para sepuh/ para pinisepuh/ miwah para kadang sepuh/ kakung saha putri/ kula nyuwun pangapunten.
Kula tampi atur panjenengan/ kanthi ikhlasing manah/ kula paring pangapura/ dhumateng panjenengn.
Mangga sareng nyuwun/ mugi- mugi/ / Alloh s.w.t/ paring Ridlo/ nglebur dosa lepat jengandika kula/ wontening dinten riyadin menika!
Ammiin ya rabbal ‘alamiin.
Mekaten ingkang saged kula tindakaken minangka pangemban dhawuh. Sepisan malih, kupat janure tuwa, kathah lepat cumadhong lumunturing sih pangaksama.
Wassalaammu ‘alaikum wr. Wb! (Bulak Amba)
Tidak ada komentar:
Posting Komentar